筆是機場｜限制投資中國科技領域　美國果真是「世界惡霸」

文/稀思路

喺國際關係，學者會去研究唔同嘅國家，究竟係用咩方式同其他國家「打交道」，有啲會出力扶助其他國家，有啲就係憑「拳頭大」欺負其他國家，前者嘅代表有中國，後者嘅代表者就有美國。美國曾經係「世界警察」，但過去幾十年越玩越惡，基本上已經無異於「世界惡霸」。近日，佢又再使出新陰招針對中國，宣布明年1月2日起，限制個人同公司投資中國、包括香港嘅人工智能 (AI) 同半導體技術。喺一個自由貿易嘅國際體系，美國連限制投資呢啲招數都出埋，佢除咗係霸道之外，其實係咪驚咗中國發展呢？

29日早上，行政長官李家超見記者，表明「這些將損害環球供應鏈，及美國本身利益及美國商業利益。美國政客為求政治目的，損人亦損其國家、國民及企業利益，將自食其果，特區政府會捍衛自身利益及保障香港企業利益，我們亦會同國家共同保障國家利益。」

喺談話內容中，其實李家超仲講出一個關鍵訊息，就係過去10年，美國同香港做生意，貿易順差係2700多億美元，即係約有21000億港元，平均每年喺香港賺超過2000億港元，然後又推出措施針對香港同中國，難怪李家超批評美國「損人又損己」。筆者睇返資料，其實香港仲係美國享有貿易順差嘅第二大夥伴，即係香港一直為美國「生金蛋」，美國依家再出手針對香港以至中國，讀者諗下，係值，定係唔值？

今次美國推出嘅措施，係針對中國同香港嘅AI同半導體等投資，依家中美博弈越來越激，最關鍵嘅領域之一，就係AI同半導體，之前筆者已經寫過，基本上美國就係全方位封殺中國，想中國買唔到任何製造先進半導體嘅設備，但同時，中國又自己想辦法，製造盡量先進嘅半導體，之前華為手機，就使用過中國自己製造嘅芯片。美國一直打壓，中國一直進步，最大輸家，就係想同中國做生意但畀美國禁止嘅廠商同國家，所以美國其實仲係損害緊盟友利益，並藉此對付中國。

至於喺AI領域，其實全球就係得兩個AI大國，中國同美國，講半導體例如芯片等，的確係美國先進啲，所以電腦嘅運算能力（影響AI發展）應該係美國強啲；但筆者唔覺得中國差太遠，因為中國人口多、數據多，而且喺應用不同資料再供資料畀AI訓練肯定唔畀美國差，美國要禁止個人同公司投資中國AI或半導體事業，其實講到尾，係驚中國發展得比美國好，表面係霸權，實則係怯懦，呢個仲話係超級大國「喎」！

有學者已經分析過，由國際體系到西方國家，過去百年建立嘅體制正在崩潰，喺國際層面，過去自由、合作嘅機制，筆者覺得係美國嘅霸道有份破壞；西方國家內部嘅崩潰或分裂，唔駛舉太多例子，讀者們睇下美國選舉就知咩事。西方國家正值多事之秋，與其搞中國，不如尋求同中國更多合作，爭取雙贏仲好；不過，美國等國家領袖有冇呢種遠見？似乎沒有，可惜！