創新低價！食客以$0.5食牛角Buffet　老闆黃傑龍︰已經係極致啦

【點新聞報道】高手在民間！繼早前有食客以低至$11.4享用牛角Buffet後，牛角老闆黃傑龍再分享有網民挑戰新低，以$0.5食到牛角Buffet，令他不禁形容「已經係極致啦」。不過，有網民就留言笑言「如果出現倒貼單，咁就精彩啦」、「希望見到再高難度，食飯有番幾十蚊落袋」、「我想睇食完現金回贈」。

黃傑龍日前在fb分享客人向他傳送圖片，表示「你好呀黃生，你哋真係好抵食」，並附上位於尖沙咀美麗華牛角Buffet的收據，顯示總額只要港幣$0.5。黃傑龍在帖文回覆笑言「已經玩到$0.5，我諗都已經係極致啦，得啦得啦，大家唔使再表演俾我睇啦」。

從收據上得知該名顧客於下午時段惠顧了一份價值$5的「溫泉玉子」，並使用會員積分換領了一份午市定食A，且享有8折優惠-$1以及「綠卡(食晒有賞)」-$4，總折扣-$5，另加一服務費$0.5，埋單總額為$0.5。

有網民留言指「食客好體貼，唔係午市繁忙時間咁玩，下午茶時間先黎幫襯，係好人。」黃傑龍回覆留言亦大讚「我啲客好好㗎，一向都，大部分」；有網民就問「會唔會有辦法玩到倒扣俾返錢個客？」黃傑龍就回應「應該唔得嘅啲條款寫到，我諗我啲同事冇咁笨啩」。

不過，有網民擔心該店會蒙受損失，「咁樣唔係好得意，係會整死一間企業同埋運作」、「希望唔好玩爛改制」，但有網民反駁應先了解積分來源，「其實應該多鼓勵大家去挑戰新低，因為之前無食返一萬幾千嘅消費，係唔可以參加呢嘅活動㗎。」、「多心，佢背後積分使咗不知幾多先玩到」、「背後食咗好多錢啦，點會咁易玩爛」、「唔係每個食客做得到的。成功挑戰者真叻」。