舞台劇演嫖客　MIRROR成員王智德無偶包

【點新聞報道】打正旗號以恐怖掛帥的舞台劇《一樓一會》，首次邀MIRROR成員王智德（Alton）及YouTuber嘉盈主演。今次HOY TV主持俞詠文就請來劇中演員及主理人潘紹聰暢談一番。

對於每年萬聖節期間都會舉辦舞台劇，「鬼王」潘紹聰表示希望一年一聚：「因為託賴上年嘅舞台劇有好好嘅口碑，亦都有好好嘅票房，咁希望每年香港都會有一個以鬼故事為題材嘅舞台劇出現。而講到攞咗Alton嘅第一次（做舞台劇及飾演嫖客），係因為要喺市面上搵一個未做過舞台劇，個樣又唔太似嫖客，外表上有啲乖巧，又有啲毒男嘅感覺，Alton就完全適合喇！講真，嫖客冇樣睇㗎嘛！」

身為當紅男團成員的Alton接受演嫖客，他坦言沒有偶包：「初時公司都有拍我膊頭，問我介唔介意，會唔會驚？但係我覺得舞台劇就可以做下現實生活唔會發生嘅事，所以就決定挑戰一下!」   

講到故事以寂寞做主題，潘紹聰同演員麥沛東就有自己的見解：「麥東之前都有講過，寂寞其實係每個人都一定經歷過嘅，佢唔一定係負面，喺寂寞嘅時候，自己可以靜落嚟，諗一諗，自己有乜嘢可以改變，沉澱一下。」麥沛東說：「寂寞，中性一啲就可能叫做獨處，再好啲就叫做me time，感覺即刻唔同咗，成件事就會好開心! 」

Alton對於寂寞另有見解：「以前細個覺得一個人冇人陪，就係寂寞，大個咗再深層次嘅寂寞，就係冇人明白你，哪怕你身邊有10個，甚至100個人陪住你，陪你食飯，陪你傾計，但係都係冇人明白你，入唔到你嘅心，呢啲先叫做寂寞！」

（點新聞特約記者陳惠芳報道）