移英港人後悔買樓冇退路　經濟糟糕焗住硬食

【點新聞報道】不少移英港人因銀兩有限，要「睇餸食飯」而選擇定居二三線城市，殊不知為日後的生活埋下苦果。近日有移英港人大吐苦水，話經濟唔好，被迫要返啲自己唔鍾意嘅工，做一啲違心的工作，皆因當初急住買樓，結果困死自己，惟有焗住硬食喎。

該名移英港人在社交平台發文指，移民英國三年多，覺得今年嘅情況最糟糕，並細數當中的難處，包括：「搵份好少少嘅工又難」、「搵個自動波嘅教車師傳又難」、「自己想做生意搵個舖位都難」。樓主指，「經濟唔好，被迫要返啲自己唔鍾意嘅工，做一啲冇進步冇嘢學嘅工作內容，同埋做一啲自己唔鍾意做嘅事！」

樓主慨歎道：「既然嚟到依度做乜要做啲違心嘅事呢？我想做一啲自己唔違心的工作，似乎都係不容易嘅事！」樓主左思右想下，得出的原因是「可能自己揀錯地方落腳啦！」因此，奉勸同路人要選一個有發展的城市居住，「唔好急住買樓困死自己，因為一旦經濟唔好，住喺三四線城市係好快見到情況，到陣時就變咗冇選擇！焗住硬食！」

不少網民揶揄「咩都難，佢講嘅都係common sense 嚟之前無諗過？ 」、「去邊度旅遊都可以，去搵食難！」、「真係唔明無基礎學咩人買樓」。