筆是機場｜美國更新商業警告　就是一則「抹黑啟示」

文/稀思路

連消帶打地抹黑，係外國勢力抹黑中國以至香港嘅慣用伎倆，國家以至香港特區立法維護國家安全，外國勢力話係「政治打壓」，然後又伸延落去，話立法會影響到自由、經濟、國際金融中心等等，但佢哋講嘅毫無根據之餘，更加係忽略咗香港國安法以至《維護國家安全條例》嘅積極作用，即係好事當壞事去講。

最近，美國政府多個部門發出所謂「更新版商業警告」，抹黑香港國安法和《維護國家安全條例》可能會對美國企業產生負面影響，特區政府政務司司長陳國基就批評，美國無所不用其極透過香港打壓國家發展，企圖嚇怕來港的投資者，但此計謀不會得逞。一個簡單道理，如果維護國家安全嘅法例係保障市民生命、財產，點會影響到外資營商？美國玩抹黑，但不合常理！

美國嘅所謂「警告」，最大用意在於警告美國企業喺香港嘅營運同活動面臨風險，尤其指香港國安法以至《維護國家安全條例》，稱有關法例影響自由同人權，仲聲稱美國企業都應該意識到「風險」。筆者想讀者們思考一個問題，香港國安法以至《維護國家安全條例》，到底係保護香港同商人，定係對兩者有負面影響？

一個事例，就係2019年黑暴運動時，當時街頭充斥打砸搶燒嘅暴力場面，唔好話正常做生意、招商，當時唔少人連出街、返工都有困難，甚至受到暴力威脅；筆者記得當時有賣樓嘅地產經紀，以「世界末日」嘅口吻打嚟問筆者有冇興趣買樓，以當時樓價計算，算係一個「跳樓價」，而處理黑暴嘅關鍵，在於香港國安法立法，所以香港國安法嘅作用，係保障市民以至商人嘅安全，美國講嘅、諗嘅，係完全無道理，更係忽視咗香港國安法嘅定海神針作用。

事實上，美國嘅所謂「警告」，仲有一個好唔合理嘅論點，香港國安法同《維護國家安全條例》，假設有人犯罪，最常見情況係有人嘅行為危及到國家安全，例如煽動「港獨」、勾結外部勢力危害國家安全，或者係作出嚴重嘅暴力襲擊等；讀者們可以諗下，美國企業嘅種種商業行為，會唔會同以上罪行沾上邊？做生意嘅人，本地嘅、內地嘅以至外地嘅，基本上得一個目標，就係盈利，大部分商人未必會參與政治，就算參與，都好難會玩攬炒呀？（黎智英除外）

老屈香港國安法影響營商，真係好難令人信服，引用香港特區政府發言人嘅說法，香港特區政府發言人指出，香港今年競爭力排名世界第五，去年外來直接投資流入金額係全球第四大，香港同時係全球第十大商品貿易經濟體，「客觀事實都是高水平安全護航高質量發展的最佳實證，並非個別國家政府發出所謂『商業警告』就能夠改變。」而且，一個喺香港嘅主要外國商會喺今年初嘅調查反映，近八成受訪會員對香港法治有信心。睇晒唔同資料，筆者反而有種感覺，就係在華、在香港嘅外國企業包括美國企業，可能會諗「美國政府搞政治還搞政治，唔好阻住我搵錢啦！」