筆是機場｜《華爾街日報》為了反華　罔顧事實盲撐《立場》

文/稀思路

本來，上星期筆者已經寫過《立場新聞》案，講到明從事新聞工作唔係罪，但唔能夠借新聞工作而犯罪，不過，對於外國勢力以至外國媒體而言，有反政府嘅香港傳媒人被定罪，佢哋梗係話係特區政府同法庭唔啱啦。日前（9月2日），《華爾街日報》就有篇評論文章，稱「在香港從事新聞工作現在可能被視為犯罪」等等，令保安局局長鄧炳強都要回應，怒斥該報扭曲事實，係卑鄙嘅政治操縱，並強調特區政府將堅定不移地繼續維護國家安全。筆者都覺得《華爾街日報》非常荒謬，係對特區政府「屈得就屈」。

如果筆者無理解錯，《華爾街日報》相關文章應該係「Hong Kong Convicts Two Editors」（香港判決兩名編輯罪成），文章第一句就話「Businesses need reliable information to make decisions, but practicing journalism can now count as a crime in Hong Kong」（營運需要可靠資訊去作決定，但現時在香港從事新聞工作可能被視作犯罪）。就咁睇，讀者們覺得有冇問題？筆者話你知，有！都係嗰一句，從事新聞工作唔係犯罪，但借新聞工作煽動，就可以係犯罪。

「Businesses need reliable information to make decisions」，但筆者用另一個角度睇，當生意人需要可靠資訊時，廣大市民睇傳媒報道，又何嘗唔係需要可靠嘅訊息，如果有傳媒係採訪、報道以及評論時，係發放可能會煽動仇恨、犯罪嘅訊息，筆者仲要問多一句《華爾街日報》，涉事媒體係咪「reliable」（可靠）呢？

各位讀者如果有興趣，可以睇返筆者上星期一篇文章，當中有提到《立場新聞》共有17篇文章被指涉及案件，最終有11篇被法官裁定具有煽動意圖，當中有「走佬政客」羅冠聰涉及詆毀香港國安法嘅文章，有侮辱法官及法治嘅文章，亦有美化暴動行為嘅文章，讀者們認為《華爾街日報》文章作者有冇審視過有呢啲文章，可能係冇嘅！

從法律去講，其實《華爾街日報》仲有一個位，相當值得批評，從其文章脈絡可見，作者係想話香港國安法立法令《立場新聞》人士被控，筆者有睇返相關資料，《立場新聞》資產被凍結，係根據香港國安法第43條《實施細則》附表三發出凍結財產通知；不過，《華爾街日報》可以睇真啲《立場新聞》母公司、前總編輯鍾沛權及前署任總編輯林紹桐，被控告嘅罪行係串謀發布或複製煽動刊物罪，係香港原有法律或普通法罪行先啱。《華爾街日報》想誣蔑人，但如果連罪行來源都未搞清楚，真係 ......

最後，同各位讀者講少少邏輯問題，《華爾街日報》嘅邏輯，係想話喺香港做新聞，可能會被判有罪，但講真，佢嘅講法跳咗好重要步驟，就係媒體人，如果犯法，可能會被判有罪；《華爾街日報》已經唔係簡化事情，而係扭曲事情，再老屈特區政府，嚴格意義上，文章除咗有誹謗或詆毀成分，仲已經達到「假新聞」級別。一個全球知名嘅媒體，竟然靠老屈嚟吸引人睇，《華爾街日報》，真係嗚呼哀哉！