準佳麗最怕問答環節　高Ling傳授最緊要笑

【點新聞報道】港姐特備節目《2024香港小姐女·遊記》播出香港篇，兩位港姐師姐高海寧（高Ling）、謝嘉怡（Lisa），聯同賴慰玲帶領三位來自不同地方的參賽佳麗遊覽香港，包括來自河北的9號陳甜甜、來自加拿大的11號梁嘉莹和來自荷蘭的14號楊梓瑤。

高Ling帶一班師妹去到大澳親親大自然，她們先是大開食戒品嘗大澳名物「大大粒魚蛋」，之後再坐船出海睇中華白海豚。大家閒談期間講到最怕問答環節，高Ling大表認同：「當時最驚就呢個環節，個腦係一片空白，但咩都好最緊要記得笑！」來港不久的9號陳甜甜其實只用了兩個星期學習廣東話，廣東話水平已經明顯進步不少，11號梁嘉莹大爆9號陳甜甜非常用功練習：「佢睇粵劇睇到凌晨2點。」高Ling聞言即好奇陳甜甜看「大戲」練廣東話，但其實11號梁嘉莹所指的「粵劇」其實是粵語劇集，鬧出一場笑話。

另一師姐Lisa帶三位佳麗到訪電視特技班體驗拍動作戲，當中14號楊梓瑤最為大膽，吊威吔從高處跳下毫無懼色，更在空中自己Chok甫士。9號陳甜甜和11號梁嘉莹則比較細膽，跳下來前嗌到七彩，幸好最後都能完成任務。最後Lisa帶佳麗們去到地道茶記食蛋撻飲奶茶，期間眾人提到網上看到不少Haters留言，14號楊梓瑤坦言曾被指鬥雞眼感到不開心，Lisa向一班師妹傳授高EQ應該方法：「咁你照鏡覺得有冇？你覺得冇，咁點解你要care人哋，嗰個人唔識你。」

三位佳麗齊齊化大戲妝體驗粵劇文化，當中11號梁嘉莹化了花旦妝並學習耍槍，她說：「啲衫同頭飾好重，好難郁，唔夠半個鐘個頭已經開始痛。」話雖如此，但11號梁嘉莹仍然非常落力練習。至於14號楊梓瑤則反串做小生，其英姿獲高Ling大讚：「佢好做到嗰種英氣，無論聲線、眼神，成個動作都有男子嗰種氣質。」

製作組準備了香港製造的Gin酒送給三位佳麗，她們順道大玩香港流行的酒Game真心話大冒險，問到會選擇哪位男演員合作愛情劇？9號陳甜甜含羞答答說：「黃宗澤，鍾意佢靚仔！」期間14號楊梓瑤透露家中比較傳統，有重男輕女的情況，不禁失聲痛哭。

（點新聞特約記者陳惠芳報道）