慶生70歳開唱　賈思樂自爆當年險輸身家

【點新聞報道】今年入行50年的賈思樂(Louie)將於10月9日在文化中心舉行一場演唱會，名為《Happy Together 50年 In Concert》，順道慶祝自己70歲生辰。

賈思樂表示能在同一個行業立足50年，真的非常感恩：「在娛樂圈做到而家，而且仲未退休，我真係覺得係一種福氣嚟嘅，我從來都冇諗過轉行，未入行前我都曾經做過一啲朝九晚五嘅工作，但係每一日一返工，已經睇錶睇下幾時可以放工！所以我由始至終，對做歌手都係充滿住熱誠。」

今次演唱會以英文歌為主，而嘉賓方面同以往不同，今次將會有驚喜男嘉賓登場。講到這50年的經歷，曾經獨資製作舞台劇《蝦仔爹哋》的他仍猶有餘悸：「嗰次嘅經歷真係覺得自己癲咗! 我抵押咗層樓做呢個劇，當時冇人肯做主辦或者協辦，話我過時㗎喇！你唔好做啦! 不如轉行啦! 一盆一盆冷水之後，我都係決定自己做! 咁就偷偷地抵押咗層樓，我真係唔知個死字點寫! 我仲呃盧海鵬，林建明同戚美珍佢哋，話有一個隱形投資者，當佢哋知道真相之後，鬧到我狗血淋頭，佢哋唔想我輸，所以個個都買咗十萬蚊飛，我真係覺得識到你一班朋友簡直係我一生嘅福氣! 」