重提當年半工讀　朱茵：人生最辛苦的日子

【點新聞報道】朱茵、潘燦良和導演劉偉恒昨日 (7日) 到新城接受譚玉瑛（阿譚）、何基佑及黃筠兒主持的《QK玉瑛室》訪問。朱茵提及當年半工讀是她人生一段最辛苦的日子。

朱茵說當年她一邊修讀演藝學院，一邊返無綫拍攝兒童節目，她指當年半工讀是她最辛苦的日子，「因為兩邊走，學校有習作，又要返無綫拍兒童節目，同學之間好難明我點解要拍戲，但我逢一至五返學，周六日先拍到節目。」  

問朱茵當時為何會拍兒童節目？她笑言也不知道，「嗰時無綫、亞視都入過學校揀啲啱佢哋節目的人，我係被揀選其中一個，但我只能夠拍兒童節目，仲記得我張合約係King Sir（鍾景輝）幫我簽，拍到後尾半年就快畢業，我就同無綫講我要返去畢業，因為我要攞到張畢業證書。」

身旁的阿譚又爆朱茵當年拍節目會追問她收工時間。阿譚形容朱茵說話清晰不會轉彎抹角，朱茵則稱讚阿譚是元老級兒童節目主持，並跟阿譚說：「由我細個睇妳，到我入行同妳一齊做節目，喺妳身邊學到好多嘢，妳係靈魂人物，講嘅嘢就係。」  

朱茵和潘燦良在劉偉恒導演的新劇中跟小朋友有大量對手戲，潘燦良更會由一位「虎爸」變成暖男爸爸，而朱茵則飾演一名嚴肅的小學老師，與同住胞妹經常起爭執。提到相隔十多年再度拍劇，朱茵直言不感到吃力，「因為自己鍾意，同一班同聲同氣嘅人一齊做嘢好開心，而且香港製作真係好快手，我哋都冇乜甩過，係一個好好體驗，未來日子都好期待好劇本、好角色。」

（點新聞特約記者陳惠芳報道）