同黨踩線埋伏擬爆格　移英港人呻治安差唔敢亂開門

英國嘅治安問題的確係差過香港，街上有好多小偷，入屋爆竊案件都唔少。有移英港人日前發帖呼籲同路人，唔好隨意開門同鎖好門窗，皆因其屋苑最近有人扮大肚婆，夜麻麻按門鐘求助，舉止古怪之餘，更發現她有三個男性同黨埋伏喺草叢，懷疑他們一伙人想爆格或打劫。

有移英港人在fb群組「英倫生活瀨野事件簿」轉發帖文，指雖然未「Fact Check」，但呼籲「大家唔好亂咁開門呀」。該帖文提到，上月30日晚上11時許，有屋苑的屋主指有女人扮大肚婆，話迷路，又冇帶電話同銀包，問可唔可以幫手佢。樓主冇開門，只是隔住門同防盜眼跟對方對話，着她搵隔離屋的本地人幫忙。

樓主覺得對方有古怪，留意到「大肚婆」去咗對面屋，而對面屋的屋主話幫唔手後，又去咗隔離屋問。之後見隔離屋的夫婦都覺得古怪，所以樓主就「攞埋電話、鎖匙同鎅刀，鎖咗自己度門行去隔離屋睇吓咩情況」，而「大肚婆」可能因為事敗，所以跑走了。

其後，樓主發現原來有3個男性同黨埋伏咗喺對面屋嘅草叢入面，見事敗就跳出嚟跑走，「咁應該係想爆格或者打劫」。樓主立即叫隔離屋的本地夫婦報警，警方表示已經收到好幾個報案電話，正安排警車到附近追截。

不過一個小時過去，樓主仍未見有警車到其事發報案位置，但就聽到附近有警車響號，最後都唔知有沒有拉到人。經此一役，樓主認為「真係好重要，唔好隨意開門同鎖好門窗。有cctv安裝多幾個保家舍平安」。