移英港人呻勁甩頭髮　釣出一堆同路人慘況

移民英國無得救，英國水一直被指會令人有甩頭髮，可以說是男人最可怕的惡夢。有移英港人就發帖求助，指自己甩頭髮甩得好勁，想問同路人有咩補救方法，隨即釣出不少人的相同慘況。

該名移英港人早前在fb群組「食在英國超市好物 / 飲食情報分享區」發帖求助，指自己居住在硬水區，「嚟咗英國之後開始甩頭髮，甩得好勁，想問問大家有無咩方法減少甩頭髮？」。

有同路人留言分享同樣經歷，「我住硬水區，頭大半年甩得嚴重，每日洗頭甩60-80條，後來逐漸好轉。而家去返軟水地區旅遊，洗完頭個頭係會黐立立。所以軟硬水身體都要時間適應」、「我都係，但過咗半年左右就冇再甩，可能係適應咗或者之前唔好壓力都唔知」、「放心，初時嚟到都係勁甩，而家就正常甩」。樓主惟有寄望「希望我都係甩甩吓唔好再甩」。

不少同路人建議都加裝Filter（過濾器），「喺沖涼花灑加個Filter過濾啲礦物質」、「食水用Filter過濾咗先煲，沖涼花灑用過濾款」。不過，樓主就半信伴疑指：「Filter真係有用？之前睇過啲人話裝完好似分別唔大，所以我仲未研究有咩Filter揀」。

另有網民建議更換洗髮水減少洗頭，「我裝咗Filter，再加轉洗頭水，之後就有改善」、「我都係咁，唔好日日洗頭... ...天氣關係，無咁濕，真係唔需要日日洗」。有人就索性建議樓主「搬去軟水區」、「剪晒就唔會再甩」。

其實睇得出移英港人真係好驚甩頭髮，他們個個七嘴八舌談論保住頭頂三千煩惱絲，有人建議用「生髮水」、「可以試吓食黑芝麻粉或黑豆粉，對烏髮防脫髮有幫助」、「有朋友甩到要睇醫生，醫生話佢缺乏維他命D」、「夏天好好曬吓」等。