香港婚後事｜小事互頂嘴 豹哥被豹嫂激到病
【點新聞報道】《香港婚後事》由陳自瑤（Yoyo）、賴慰玲（Winki）、黎諾懿及羅天宇主持，今（9日）晚一集嘉賓是圈中恩愛夫妻單立文（豹哥）和胡蓓蔚（豹嫂），兩夫婦在節目中不時打打鬧鬧互相開玩笑，豹哥更答非所問，激到一班主持紮紮跳。
相愛28年的豹哥、豹嫂恩愛如昔，豹哥說：「婚姻係兩個人三唔識七喺埋一齊，之後產生一種化學作用叫愛情，之後到你Commit要照顧一生一世，講就易囉，當你途中遇到咁多嘢嗰陣，你個心會唔會動搖？會唔會想放棄？你要重拾正軌去鞏固番個婚姻，係好艱難，一段婚姻共富貴係好容易，共患難就唔容易。」豹嫂則指最近因一事令她有新的領悟：「最近我激親我老公，激到佢睇醫生，原本係好小事，但大家喺度互頂，之後佢個胃就唔舒服，個肚好多氣，Gur咗幾日，跟住佢去睇醫生，食咗兩個月胃藥。」豹嫂經此一役後學識對老公要溫柔一點。
豹哥、豹嫂拍拖12年後才結婚，豹嫂坦言：「有個生咗兩個小朋友的朋友，好語重心長同我講，其實你哋都要諗諗係咪要結婚，之後我返到屋企，我就話邊個話我哋係咪要結婚呢，佢聽完之後就話好呀。」豹哥則認為：「我覺得結婚唔係一件大不了嘅事，簽一張紙就代表你一生一世愛呢個人咩？唔係吖嘛，呢個形式係做畀啲老人家睇，或者係做畀朋友睇，係一場大龍鳳嚟。」
講到豹哥曾有「西門慶專業戶」之稱，豹哥認為拍過三級片已是過去的事，再者簽了約就要做好件事。
（點新聞特約記者陳惠芳報道）
相關報道：
