打工仔新年發牢騷　大呻開工利是少欲辭職

農曆新年，不少公司都會向員工派發開工利是，寓意開工大吉、新一年工作順利。不過有時希望越大，失望越大。有打工仔日前在網上大呻，發現開工利是只得20元，頓時大感失望，覺得公司唔重視員工，已有辭職的打算。不少網民均表示頭一次聽人為了利是而辭職。

該名打工仔日前在香港討論區以「見到封開工利是我想辭職…」為題發帖，表示「收到公司開工利是啦，咁偷睇下幾錢見到得$20」，形容當時「一開見到嗰下真係呆晒，心諗係咪畀錯我？」，直指「真心唔派都無咁嬲，當我保安呀？」。

樓主遂趁午休時間，向其他年長同事打聽下，才發現「公司不嬲年年都係$20，叫做好過冇」。樓主大感愕然，話以往工作過的幾間大大小小的公司開工利市，都見過有50元，但認為「正正常常公價」都是100元。

雖然今年是樓主首年於現職公司過新年，但經過今次事件，現已有辭職打算，因為覺得公司唔重視員工，並詢問網民「想問宜家開工利市會少到咁咩」。

有網民留言表示「為封利是唔做真係第一次聽」、「開工利是意頭嘢，有乜所謂」、「重點是人工跟前途點ok咪忍啦」、「為咗20元的開工利市而辭職，很不值得」、「經濟差成咁，有利市收都偷笑」、「開工利是都係攞個意頭啫，你唔係咁睇唔開呀嘛，細路仔」。有留言則安慰樓主許多公司無開工利是，「算啦！」、「我老闆賺得多但開工利市得十蚊，咪笑下算」。