萬人大合唱為阿嬌慶生 Twins唱《相愛22年》淚崩
【點新聞報道】「TWINS SPIRIT 2024」演唱會昨晚（26日）來到第五場，適逢阿嬌農曆生日，萬人再次大合唱中文版生日歌為阿嬌祝賀，唱《相愛22年》前兩人深情對話，這晚更是邊唱邊喊，阿Sa深呼吸滴淚，阿嬌則是決堤，哭到淚流滿面，不少歌迷也跟着他們邊唱邊落淚。
「唔係好識笑」
昨晚阿嬌農曆生日，阿Sa叫全場萬人大合唱中文版生日歌，氣氛高漲。之後兩人準備唱《相愛22年》，阿Sa說：「咁多年，有好多人可能會話，Twins好好彩，其實我哋條路一啲都唔平坦，一開始係好純綷嘅快樂，過咗幾年，就開始唔係好識笑。」阿嬌回應說：「我仲難啲，我記得一開始，Mani不停叫我笑呀笑呀，我真係好辛苦……到慢慢開始，好多人支持我，覺得被人重視啦，我先識笑容多咗，同你一齊又開心，打開咗自己。」
阿Sa說：「神奇嘅地方係，我地細個咩都唔識，由也也烏好開心開始，之後感受到好多人情冷暖，開始自己識思考，慢慢有幾年，真係好似笑少咗，但係好慶幸，我哋真係好努力到走過咗呢啲階段。」阿嬌說：「終於嚟到呢度啦……」阿Sa說：「係呀！恭喜你呀！」然後兩人走向對方感動相擁，不過他們因為太激動太開心，攬時撞向對方臉上，兩人即時大笑。
「終有選擇權」
阿嬌笑着說，「終於等到今日啦！哈哈哈！」阿Sa說：「係呀，終於去到今日啦，終於可以鍾意笑就笑，喊就喊，享受人生，呢個工作，自己想做，呢個唔好做！」阿嬌說：「係呀，有選擇權！終於到呢個moment，實在太感恩啦！」
忍淚與淚崩
繼而兩人向歌迷道謝：「當然有一個元素係好重要，就係你哋！如果唔係你哋呢22年，一路喺我哋背後支撐我哋，我哋真係唔會行咁多，多謝你哋咁多年來嘅包容，多謝你地嘅愛。」講到呢度，阿Sa感動到開始咽哽，喊住話，「多謝你哋所有人，喺我哋最唔好時侯嘅鼓勵，好緊要真係……以下落來這支歌，唔係剩係講緊我同嬌，係講緊我同你哋嘅關係，相愛22年。」起歌之後，兩人也是喊着唱，阿嬌更哭到決堤，淚流滿面，而阿Sa則眼泛淚光，不停強忍淚水，免得唱不下去。」
畀歌迷點唱
由於是阿嬌生日，阿Sa就特別讓觀眾點歌多唱一首，經現場投票最後是《士多啤梨蘋果橙》，兩人問現場觀眾借來電話睇歌詞，料不到阿Sa借來的手機，唱兩句後電話響，她情急大叫，「哎呀，你Daddy打畀你，死啦，點算……」而阿嬌就安慰她，「唔好亂，唱埋先」，笑爆全場。
（點新聞特約記者陳惠芳報道）
相關報道：
（有片）紅館騷重現經典側手翻 Twins歷22年不變淚說奇跡
