戀上西沙 | 炎明熹保暖造型又萌又搶焦 拍攝地西貢「天空之鏡」成打卡熱點
【點新聞報道】無綫全新音樂劇《戀上西沙》近日密鑼緊鼓進行拍攝，日前主要演員炎明熹（Gigi）、李爾晨、麥玲玲、海俊傑、張美妮及林子超齊集西貢拍攝打卡熱點的泥涌石灘拍攝重要場口。Gigi分別以民族少女風及牛仔型格裝束造型出現。她為了應付其中一場彈結他場口，Gigi更於正式拍攝前於家中反覆練習，務求令拍攝更加順利。
拍攝當日氣溫雖然不算太低，但由於keep住陰天及落毛毛細雨，加上頗為大風，Gigi休息期間都有披上超厚「熊啤啤」長外套保暖，造型可愛。天公不造美還影響了拍攝進度，現場等候自己的「Gi炎粉」冒着寒風等了又等，Gigi大感不好意思，完成手頭上拍攝工作後，馬上拿着大聲公向現場所有粉絲問好，結尾一句更爆笑謂：「我都唔知講咩好，我說話係有限公司。」
Gigi受訪時一再向身後粉絲連環致歉：「其實我一嚟到（開工）已經有部分粉絲到咗，我就知道弊傢夥，希望自己可以盡快拍完，但拍劇冇可能咁快完，所以真係好多謝大家喺度等。同埋今日有啲毛毛雨同陰天都比較麻煩啲。佢哋足足喺度等咗兩個鐘頭，真係非常之唔好意思。」更邊說邊忍不住耍出「道歉兩式」，萌度爆燈。
Gigi又指很感恩最近多了很多與粉絲見面機會，並搞笑「自責」因不擅於說話怠慢了粉絲：「其實我一直都好想講多謝大家，但因為我說話有限公司，最近都見咗大家好多次面，我好似講嘅嘢都講曬咁，已經諗唔出要再講啲咩，再咇又好似有啲造作，但可以同佢哋長時間見面，我自己真係非常之開心嘅，真係好辛苦曬大家，經常支持我。」Gi炎粉除了到現場為Gigi打氣，並為劇組送上熱湯應援，相當有愛。
（點新聞特約記者陳惠芳報道）
相關報道：
