（有片）紅館騷重現經典側手翻 Twins歷22年不變淚說奇跡
【點新聞報道】Twins昨晚（21日）紅館展開14場《TWINS SPIRIT SINCE 2001 LIVE IN HONG KONG》演唱會，蔡卓妍、鍾欣潼狀態大勇，又跳又唱，經典側手翻也重現舞台，首首代表作歌曲，無敵回憶帶領全場歌迷由頭大合唱到尾。而一班英皇藝人歌手，總動員幫Twins拍攝過場片，眾人發揮「扮嘢」一面，惡搞「鐵達尼」、「Barbie」、「明日戰記」等電影場口，溫馨又搞笑。
Twins披上拳賽戰衣揭開序幕，神秘突襲現身，全場即嗌爆，拿走戰袍，以全身粉紅色裝扮登場，唱出一系列經典代表作。當蔡卓妍（阿Sa）和鍾欣潼（阿嬌）演唱《跅跅步哈姆太郎》時重現初出道招牌側手翻動作，全場叫聲掌聲震裂紅館。
Twins在演唱會上，笑言自己是一個奇跡。阿Sa說：「22年前我哋出道咗四百日，就開我哋第一個紅館演唱會，嗰時係一個奇跡，估唔到今日出道22年仲可以開演唱會，亦都係一個奇跡。」阿嬌說：「作為組合仲可以一齊咁耐真係好難得，好多時其他組合突然鬧交，或者有更好發展，慢慢俾人淡忘，我哋都唔知幾時係我哋最後一次開演唱會。」阿Sa繼續說：「你哋知啦，我哋兩個年紀愈來愈大，唔係以前𡃁妹仔，所以每一次都好珍惜，每一次都唔知係咪我哋最後一次。」阿嬌感性說：「好多人話我哋代表佢哋青春，但係你哋都代表我哋嘅青春呀。」阿Sa接着說：「好奇怪掛㗎，我哋企埋一齊，就好似返返年青時，冇老過咁㗎！哈哈。」阿嬌：「你知唔知點解？因為聽得多我哋嘅歌囉。」阿Sa話：「我哋可能係傳說之中嘅不老之藥，哈哈。依家有得望就望多幾眼啦，係咪即刻覺得自己回春啦，哈哈哈。」
全場大合唱《下一站天后》之後，阿嬌和阿Sa分別在台上說出感謝對方的話，阿Sa閃着淚光向阿嬌說：「22年前完全唔會想像到，呢個就係我哋嘅將來，雖然途中有好多大大少少障礙，從淚光之中走到這個年紀，但係我知道無論係開心定唔開心，係人生高光時刻，定係低潮時期，我哋終於從一個階段走到另一個階段，但係無論邊個階段，我知道你都會同我一齊，多謝你呀，鍾欣嬌。」阿嬌多次抹淚：「由細到大我都唔係一個自信嘅人，好多時遇到困難，我都會逃避，但係你就會走出來幫我解決，幫我出頭，支持我，有你係我身邊，你嘅自信，你嘅開朗，係我學習嘅對象，我以前成日做嘢都半途而廢，唯一我冇放棄就係我哋嘅友誼，係維持得最長。我好幸運好感恩，可以遇見你，可以同你組成twins，多謝你呀，蔡卓妍。」現場歌迷、觀眾人人都被他們打動到眼濕濕，不停大叫Twins唔好喊，連台下容祖兒都被二人感動偷偷抹淚，之後她們唱《相愛22年》時也淚灑現場。
昨晚演唱會適逢是阿嬌正日生日，阿Sa悉心準備為阿嬌慶生，她呼籲全場歌迷在凳底拎起海報，並舉起齊齊向阿嬌說生日快樂兼唱生日歌，結果因為有歌迷向最前面行衝，不坐位中，又有人把海報的顏色互相調亂，破壞了阿Sa原本的計劃，沒有辦法統一生日快樂字句畫面，阿Sa搞笑道，「哎呀，我真係畀你哋激死，呢單嘢我搞咗好耐，我嘅概念圖係好靚㗎，依家變咗抽象派啦。」阿嬌笑住話，「唔緊要啦，心意我收到晒啦。多謝大家。」最後演唱會Twins以經典歌曲《風箏與風》為頭場演唱會完美落幕。
（點新聞特約記者陳惠芳報道）
相關報道：
