有汗出無糧出　移英港人喊咁口

移民英國人生路不熟，辛苦搵到份工，居然無糧出，慘成免費勞工！一名移民英國的港人日前發文大呻，返咗兩日工廠，發覺收唔到人工，話係銀行代碼錯咗追唔返喎。有網民揶揄「見你夠蠢先用呢個藉口」、「唔呃你哋呃邊個」、「手足係唔會介意為英國無私奉獻嘅」。

該名移英港人在fb群組「香港人移民英國資分享」發文話，「喺英國返咗兩日工廠工，發覺收唔到人工，最後確認係銀行sort code錯咗」，於是他便向工作中介求助，點知對方回覆佢話「應該追唔返嚟，因為係公司自動系統唔經人手」喎。

有網民點醒樓主話，「我覺你被人昆多啲。連sort code呢件事可能本身都唔存在」，該網民解釋指，「淨係sort code錯都過到數，首先要個sort code存在，然後喺嗰個sort code (bank/branch)底下有同你一樣嘅account number,然後仲要同你同名，基本上係無乜可能」。有人安慰樓主「好在早發現，虧兩天工資，當交學費做義工，好過蝕一個月人工。」