一家五口得25萬身家　港媽為下一代妄想移英

很多人移民都是話為了下一代，但其實係「幫緊佢」定「害緊佢」呢！近日有港媽在網上發文話，一家5口打算移民英國曼徹斯特，但資金超有限，七除八扣後，只有25萬元資金。不少網民質疑不是異想天開，就是無知透頂。

該名港媽日前在fb群組「曼城港人谷」以匿名發帖話，自己一家五口，小朋友分為7歲、12歲和14歲，資金超有限，扣除晒申請費用和機票錢後，只有25萬港幣。她坦言，「知道真係好少錢」，但為了下一代先會「咁博」，話兩公婆一到埗安頓好晒會即刻搵嘢做喎，遂問網民「租曼城邊一區唔太雜、而租金又較平㗎？」

有網民留言反問「其實一家5口，3個小朋友得25萬，就算係香港，係點生存？」有人提醒「畀咗第一年租，仲要考慮第二年的租金。如果收入低，過唔到壓測，好多業主都會要求再upfront一年，呢一點都要考慮」。

另有網民則提到「最大難關可能係5年後5個人申請永居個費用」，指「3個細路，如果得1個人做嘢應該係近乎月光族，個永居費用係唔會儲到番嚟」、「一人工作，要有較高收入先可以養五個，仲要突破稅網儲錢，談何容易。」