鄭少秋喪女暫不打擾 汪明荃：等佢靜下
【點新聞報道】汪明荃（阿姐）今日（3日）為代言多年床褥品牌拍攝廣告，對於鄭少秋（秋官）大女兒最近在美國自殺身亡一事，阿姐坦言秋官需時間沉澱，暫不會致電慰問。
阿姐說：「知佢有個大女，等佢靜吓，兩公婆商量吓，仔女嘅嘢都麻煩嘅，又唔係一齊住，睇唔到咁多，佢都好大個已經55歲。」她表示對方習慣不接電話，故未必會致電慰問：「之前我哋想搵佢嚟煇黃演唱會，佢都完全唔聽電話。（有冇私下有聯？）冇，飲茶都冇，拍完戲大家各自各，登台時候就會見到。」她坦言不清楚鄭的大女是否有情緒問題。問到鄭的另一女兒鄭欣宜（Joyce）近日情況如何？阿姐說：「我同佢熟嗰啲朋友都話佢冇事，畀啲時間佢，睇相以為佢咁瘦係減肥。」
阿姐談到與品牌連續合作了35年，是她代言得最長的一個品牌，問到片酬是否滿意？她說：「每次都會多少少。」她指與老公羅家英喜愛選擇對脊骨較好的硬床褥。（家英哥多唔多反瞓？）「佢有鼻鼾，不過我都有，所以唔會嘈醒我。」談到家英哥早前生日，阿姐表示送上蛋糕、長壽麵及雞蛋為老公慶生，但沒有預備生日禮物，她笑指自己的生日也很接近：「大家都冇送畀大家，互免。」
阿姐表示上星期跟考古學者及一班大學生乘座高鐵到內地考察，車程快捷，但適逢中秋日回港，故站內人頭湧湧找不到路：「同埋女廁格數少又好污糟，有好大改善空間。」阿姐表示自己較少北上消費，但亦有聽聞近日多港人北上外遊：「好多人話平、靚同服務好，我哋要學習囉，佢哋本地遊有好多嘢玩，睇吓佢哋有乜嘢需要我哋再去改進。」
（點新聞特約記者陳惠芳報道）
相關報道：
