張秀賢倫敦遇債主追債　賣慘話「依家失業」

【點新聞報道】遇到厚面皮到極致的債仔可以點！移居英國嘅政治學者黃偉國昨日喺社交平台發文話，喺倫敦撞到欠佢26萬港元未還嘅攬炒派前元朗區議員張秀賢。佢當然唔放過機會，向對方提起該筆舊債，「當時你唔咪一個月還五百蚊畀我咩？」張秀賢就「賣慘」話依家失業喎。

黃偉國在帖文表示，唔知係咪個天可憐我無錢使，定係仲有孽緣未清，當晚8點幾竟然被佢喺倫敦一個美食廣場，撞到債仔「秀賢姐姐」，話張秀賢當時正同一個應該值懸紅有50萬或以上的組織高層「吹水」。債仔債主冤家路窄，黃偉國形容「佢見到我門西咗面啞咗數分鐘個樣真係有趣」。

無見對方超過一年半，黃偉國當然唔放過機會，向張秀賢提起該筆26萬嘅舊債，問「當時你唔咪一個月還五百蚊畀我咩？」然後，張秀賢就話「依家失業，加上區議會又就嚟提名，於是咪走過嚟。」最後，差唔多晩上10點，大家到做完戲各自散水。黃偉國並在文末Hashtag「究竟佢會一個星期後返香港定係留響英國」，叫「各位英國的苦主去倫敦碰運氣撞唔撞到佢」。

有網民留言話「哇黐X線，冤有頭債有主，咁都撞得到」、「咁時運高」，黃偉國就慨嘆話「時運高就收咗錢啊！」