港媽恨移英拎仔女當藉口　老公企硬寜離婚拒移民

移民是一個重大決定，要與家人傾清楚，否則隨時引發家變。一名港媽在社交平台指，為了下一代有更好的成長環境，遂多次向老公提議移民去英國，點知對方極力反對，最近一次仲嘈到嗌離婚，港媽坦言「估唔到佢寧願離婚都唔想移民。」有網民就苦勸港媽唔好攞仔女當藉口，「自己想走又要迫人走？咩心態。唔識調返轉諗下」。

有媒體報道一名港媽的家庭故事，指港媽是從事採購月入3萬，老公做教師月薪6萬幾，結婚時老爺送咗層樓給他們，生活算幾安穩。至去年底，港媽希望讓一對仔女有更好的成長環境，於是同老公提議移民去英國，點知對方好大反應話唔鍾意去外國生活，反問「留喺香港有咩唔好?!」。然而，事隔大半年，港媽卻愈來愈渴望移英，但每次同老公提起都鬧交收場，最近一次仲嘈到嗌離婚，老公仲直接叫她自己走，唔好帶走一對仔女。

港媽遂問網民「咁我可以點？」，不少網民都認為「小朋友唔係擋箭牌」，指港媽「講到移民好似去個旅行咁，其實真係唔簡單」、「要佢(老公)棄穩定嘅工、棄埋愛錫兼送層樓畀你哋嘅家人，咁都做得出，想走咪自己走囉!」

另有網民分析指，「而家英國嘅幾個大城市都排緊隊破產，仲去？有錢去邊度都得啦，何必要搞到咁呀？如果只是想小朋友出去讀書，澳洲同美國都唔錯呀」。