義賣月餅救流浪動物 炎明熹親自入廚做餅
【點新聞報道】炎明熹10月在九展舉行一連兩場《炎明熹Gi-FORCE演唱會》，密鑼緊鼓為演唱會排練的她，早前抽空與八位粉絲一起到餅房做月餅義賣，收益在扣除開支後，全數撥捐「沙律貓狗之家」。
今次活動，由Gigi的歌迷會一手一腳籌劃，除了為慈善，同時慶祝Gigi出道兩周年，名為「Gigi炎明熹出道2周年慶祝活動慈善義賣嘉年華」將於9月16日、17日舉行。當日除了義賣Gigi有份做的月餅，還有多款限量精品，包括由Gigi親手繪畫的手繪布袋、演唱會簽名海報等。
首次做月餅的Gigi坦言製作過程有點戰戰兢兢，她說:「因為第一次做，所以有啲手忙腳亂，加上每個步驟唔可以急亦唔可以錯，需要好大嘅耐性同記性，好在現場有老師一步一步教我同fans應該點做，我哋會義賣一百盒，每盒有四個，售價$218。fans仲好細心，設計咗幾款餅模，其中一個仲係歌迷會嘅logo。」歌迷會更特別定制了圍裙給她，上面印有模仿Gigi樣貌設計的公仔「Gi囡」，當穿起圍裙時，Gigi也忍不住說：「我好似大廚！」
另外，當日歌迷會安排了一部爆谷機，恭賀Gigi兩場演唱會爆賣，她說：「嗰日好多第一次，第一次做月餅，第一次整爆谷俾自己同fans一齊食，但我唔敢食太多，因為要好好保護把聲。」
歌迷會挑選流浪動物機構作為捐款對象，或多或少與Gigi喜愛動物有關。Gigi說：「我好鍾意動物，但做主人好大責任，我又要兼顧學業，暫時未係適當時候，但我一定會支持領養，好開心今次歌迷會有呢個安排，可以一齊幫助流浪動物。」
更多閱讀：
