黃大仙站暴雨後極速恢復 前線人員長文解畫原因勁感人
【點新聞報道】日前世紀暴雨襲港，全港多區出現水浸，其中黃大仙港鐵站成為重災區，不過出乎意料地極速修復，並在翌日重開。有參與復修的港鐵前線工程人員日前於社交平台感性發文，稱「只想留個感想做記錄」，並透露當晚能極速修復的原因。
他表示，世紀暴雨當日正返「中更」，但因為暴雨令夜更同事仍未返到，於是決定直踩「夜更」頂住。他表示，「今次可以咁快復修完成，係出於每位盡忠職守，也是基於鐵路人的使命感，完全發揮自己其崗位角色。」他指出，在面對天災，現場職員都發揮專業精神：「冇人搵枝槍指住我哋，我哋會發揮專業精神自己埋位，因為我哋係有經驗嘅工程人員，知道大約點修復同修復後會有什麼隱患，呢個就係做呢行使命。」
該前線人員更感性說：「我哋唔去，仲有邊個會去？」最後，他寄語所有人「心平氣和，在獅子山下默默發揮香港精神。」
網民紛紛在帖文下留言感謝及打氣：「感激你地哋嘅辛苦，今朝送小朋友返學，都邊行邊講，教佢唔好忘記感恩一班前線嘅付出，無你哋嘅努力，唔會咁快有我地既便利」、「辛苦晒，呢兩日可以由黃大仙站出入都覺得好amazing，多謝你同你每一位同事」、「其實真係好快，本身仲預一個禮拜冇地鐵搭」、「市民個心知道的」等等。
此外，早前網上流傳一條影片，顯示多名前線人員在黃大仙站內以人鏈方式將淤泥運出地面，其間有人於現場拍片記錄，並為眾人打氣「努力加油」、「辛苦晒」，盡顯本港團結堅韌精神。
（點新聞記者報道）
相關報道：
