呻生活難搵唔到錢　移英港人坐夠移民監即回流

盛傳不少港人正密謀回流，一名移民英國三年的港人近日網上發文分析箇中原因，話「喺英國搵唔到錢，錢又唔襟洗，生活水平簡直由第一世界去到第三世界」，並比較過當地的衣、食、住、行，樣樣都及不上香港，正所謂「無比較無傷害」，所以樓主覺得「當第一批坐夠移民監，就會開始回流」，而佢自己亦表明「我一定回流」！

該名移英港人在fb群組「從零開始移民英國：香港人圍爐生活區」發文指，就以香港平價吃迴轉壽司「爭鮮」為例，都可以喺英國變高級日本餐廳，且買嘢唔方便，好多大小牌子都唔做英國生意，脫歐之後，歐洲本地公司好多都唔寄去英國。

樓主續指喺英國買購物冇選擇，「你覺得香港個個商場都倒模咁，地產霸權嚴重，同你講英國更差日常生活都基本大財團包攬晒」、「當你嫌棄用淘寶大陸貨，但喺到大部分日常生活用品都係大陸貨，仲要貴好多，款式冇淘寶多。加上樣樣都20%vat，買個iPhone都貴過人」。

最後講到「重中之重」的住屋問題，樓主指喺英國買樓平均都3-4百萬港紙，用當地人工計，供得仲耐過供香港樓。他分析指，香港樓細貴，係因為香港買既係一間配套空間，一落街咩都有，喺英國你間屋有幾大，你生活空間就係咁大，反問「冇配套仲用百幾萬港紙買？」

最後，樓主歸納出「正如好似倫敦依啲有配套大城市，樓價一樣貴；退休可以考慮，但係到生活，真係好難」，所以覺得一定有好多人回流。