移英連登仔首日返工疑被歧視　網民嘲笑「玻璃心」

部份移民英國的港人成日鍾意笑人「玻璃心」，但其實自己個心脆弱起上嚟都幾誇張。有移英連登仔日前在討論區發文，話覺得喺英國返工疑似畀人歧視，指早前第一日返工，向同事介紹自己來自香港時，有一名英國同事忽然「起腳」，做出已故武打巨星李小龍的招牌動作，又問他會不會製作幸運餅乾，樓主直言「真係分唔清佢想笑我定係份人熱情」喎。

該名移英網民在「連登討論區」發文憶述，他日前在英國第一日返工，見到同事就主動打招呼及自我介紹，點知其中一名英國同事知道他來自香港時，「無端端起腳扮Bruce Lee（李小龍） 喺度『A Cha』，話覺得chinese kufu(中國功夫)有型，搞到全層同事望晒過來」。

樓主續指，該名同事仲問他識唔識整fortune cookie（幸運餅乾），這連串舉措，令樓主感到非常困惑，直言「我真係分唔清佢想笑我定係份人熱情」，故希望求教一眾網民意見，對方究竟有冇歧視。

帖文引來不少網民回應，大部分人都認為該名同事沒有惡意，「似戇X仔多，咁啱又鍾意中華文化」、「係熱情癲咗啲，香港人唔適應」、「一開始唔識你，無話題，講下笑，咪玻璃心，仲幫你令其他同事對你有印象㖭」。