馮允謙紅館騷尾場 學友壓軸「現身」打氣
馮允謙（Jay Fung）一連三場紅館演唱會，昨（27日）晚圓滿結束。歌神張學友更驚喜「現身」，拍片為Jay打氣，大讚他真誠有禮，如果其父母向他「過兩招」教子心得，他願以擔任Jay演唱會嘉賓作回報，全場歡呼。
之前兩晚林明禎與Jay唱《Versace on the floor》時，大跳辣身舞之後直接落台離場，昨晚終於開金口，明禎說：「希望下次我哋唔只跳舞，仲可以合唱。」歌迷立即起哄，她清唱幾句《長相廝守》，觀眾報以熱烈掌聲。
另一位表演嘉賓張天賦（MC）與Jay合唱《世一》，Jay說：「大約一年多前，公司話有個新人唱歌好好聽，而我寫咗一首歌自己都好鍾意，我唔係後悔呀，因為覺得佢會唱得好好，就係《反對無效》，多謝MC唱紅咗呢首歌。」MC表示希望攜手作一首新歌由Jay主唱，Jay搞笑回應：「我會，如果唔太難聽的話。」
Encore時Jay換上新衫出場，台上大銀幕突然播出張學友的打氣短片，連Jay都表示好驚喜。片中學友說：「多謝Jay嘅父母鍾意我，喺Jay面前經常播我啲歌，影響佢聽中文歌，呢個好重要，係我哋身為歌手嘅其中一個功用。我亦要恭喜你哋，我有事想請教，我覺得你哋好成功養育出Jay成為好體面嘅人。我記得第一次見Jay，已經覺得佢非常陽光，一看上去就係可以付託終身、好老實、可以信賴嘅年輕人。我想問你哋點樣教到個仔咁樣？我自己都兩個女，希望有個機會你哋教我，我便去做Jay演唱會嘉賓。」全場歡呼，Jay都開心到難以置信。
之後Jay表示感謝家人對他的支持，特別感激爸爸65歲仍在工作，因為他擔心做這行收入不穩定。Jay對台下的爸爸說：「I love you.」又說：「我覺得自己只係個nobody（普通人）好彩有公司幫我出歌和開演唱會，我可以喺大家面前唱歌係我嘅榮幸。」
演唱會尾聲，Jay邀請全場大合照，歌迷會在開騷前向觀眾秘密派發手幅，此時全場高舉「See You Next Time」手幅，預祝他盡快再開演唱會，令Jay非當感動。完場後歌迷踏地大叫「Encore」，Jay再度出場多唱兩首歌，Jay紅館處男演唱會完美落幕。
（點新聞特約記者陳惠芳報道）
相關閱讀：
