被女友要求移民加拿大　連登仔自言「人生路不熟有啲淆」

近年不時聽聞有情侶因移民達不到共識，最終分手收場！日前一名港男就發文話，自己是一名正在創業中的老闆，啱啱先續租又裝修咗辦公室，惟近日他的女友提出一同移民加拿大，令事主苦惱不已。帖文引起不少網民熱議，最多人關心他一旦移民後，「盤生意點先」，力勸樓主要考慮清楚，「移完幾年又回流嘥時間，明明有自己事業又做得幾好就唔好咁輕易放棄」。

港男在「連登」討論區以「女友叫我移民加拿大去唔去好？」為題發帖，他先自我介紹指自己正在創業，開間小公司一年大約搵600k-700k，最近花了100k輕輕裝修過辦公室。業主好好人，6年都係象徵式加咗$1,000租，疫情嚴重時還會減半租，所以啱啱約滿續租，租約三年，第一年死約，第二同第三可以隨時走。

他的女友則由出世至大學都在加拿大成長，之後與父親回流香港，其父親開珠寶廠，女友則是從事銀行的金融業。女友在港工作數年後，她的父親因中風去世，留下了一筆遺產給她。女友有感香港節奏太快、做金融跑數好大壓力，現在有咗筆錢就諗住辭職返回加拿大，並問樓主要不要一同移民加拿大。

樓主自言人生路不熟有啲淆，但又唔想迫女友留港陪伴自己，「其實都想，但真係人生路不熟，到時去到乜都靠佢，如果佢飛起我真係有啲淆」、「我都有諗過如果去到分開，我一個人返香港由0開始我就諗到瞓唔著」。