泳兒陳逸璇將開慈善唱　呼籲勿棄養毛孩

每年數以千計流浪毛孩橫死街頭，也常發生虐待動物事件。一班從事不同行業的組織包括娛樂公司、寵物善終服務公司及音樂教育機構發起於2月23日晚上8時假旺角麥花臣場館，舉辦一埸《毛孩天台重聚慈善演唱會》，邀請多位歌手包括蘇姗、泳兒、鍾舒漫、黎美言、陳逸璇、譚嘉荃及天台音樂茶座等以歌聲呼籲大眾愛護寵物，實踐照顧牠們是一生一世的責任和承諾。

泳兒曾經有兩隻狗，性格都不同，一隻專注力很強，另一隻很衝動，她說：「希望大眾知道人係可以擁有好多嘢、朋友，有能力爭取自己想要嘅嘢，但寵物世界裏面，只有我哋又或者係食物，所以我不斷提醒自己，花多啲時間陪吓同愛錫佢哋。千萬唔好棄養，寵物不只係寵物，而係一家人。如果係一家人，又點會捨得棄養呢！當決定養寵物，首先要諗清楚照顧佢一生一世。」

陳逸璇十幾年前就已經出過一本寵物書，訪問很多領養流浪貓狗主人，讓大家知道養貓狗不一定要名牌，她說：「我嘅狗狗Bingo就係喺愛護動物協會相遇，感覺好投緣，於是就申請帶佢返屋企。其實狗仔好有靈性，我唔開心佢都感應到，有好幾次我好難過嘅時候，就係佢走上前安慰我，好多次攬住佢又笑又喊！舊年二月15歲狗仔離世，雖然好傷心，但佢13、14歲時候，搞咗個大型嘅生日會，好難忘！我好想藉今次活動，呼籲大家唔好棄養，佢哋嚟到你屋企，就成為你家庭一分子，就係一家人！」  

黎美言跟毛孩有太多難忘相處回憶，例如會一起煲劇，帶牠去做雜誌訪問，一起慶祝生日等。她表示今次演唱會，最希望帶到一個重要訊息給大家不要棄養，要盡可能領養毛孩，讓牠們有個溫暖的家。

（點新聞特約記者陳惠芳報道）