來論｜借預算案抽水　民主黨「玩浮誇」算吧啦！

稀思路/筆是機場

「你當我是浮誇吧 誇張只因我很怕」... 喺黑暴運動時，攬炒派依靠一招出位，就係鬥爛鬥黑，當時連所謂嘅溫和攬炒派，都前仆後繼地支持黑暴，之後香港國安法實施，一大班攬炒派「即時收工」；到咗今日，攬炒派即使「尚在人間」，都唔可能再喧染黑暴或者攬炒思想嚟「搵食」，咁佢哋可以點做呢？民主黨最近就示範咗畀大家睇，要鬥誇張，人哋倡議政府喺財政預算案派5000元，佢哋就建議派15000元；政界普遍支持簡約公屋，佢哋又借機批評。一個根本問題係，到咗今日，佢哋仲係用緊嗰套「抽水」、「盲反」玩法？真係失敗，而且係「失敗之中嘅失敗」。

幾日前民主黨開記者會講財政預算案建議，基本上記者會未開，大家都估到佢實會搵啲位反政府，但老實講，佢哋講嘅嘢唔make sense囉！講派錢或派消費券，其實唔少團體都有講，但正常都係講派5000元，或者都係講分批派10000元，民主黨倡議派15000元，理據何在？呢種特區政府「財赤但要派多啲」嘅思維，真係令人想唔透。

另一個民主黨嘅說法，同樣非常值得社會「批評」，佢哋唔同意政府改變現在土地「臨時用途」制度，興建臨時性質嘅簡約公屋，並認為相關項目只維持5年，唔合乎成本效益。如要講成本效益，筆者要問民主黨，政府如果派15000元，合乎成本效益咩？講簡約公屋，喺一個短期土地供應不足嘅情況下，用簡約公屋嚟幫基層市民擺脫不適切住房，民主黨又想點樣用錢或成本去衡量呢？仲有樣嘢好笑嘅係，民主黨要求政府終止中部水域人工島填海計畫研究，筆者就覺得，如果民主黨見到政府推動緊北部都會區就以為香港有充足土地發展，咁真係太天真；更何況，中部水域人工島嘅用途除咗係居住，仲係香港中西區核心商業區再伸延嘅重要部分。

相比起之參與非法「佔中」或者黑暴運動，大家可以話民主黨無以前「咁過分」，但大家可以留意一點，無論係要求派發超額現金或消費券、質疑簡約公屋至中部水域人工島等，其實民主黨嘅盲反立場，基本上係無重大改變過，只不過係以前直指特區政府嘅管治，依家就喺唔同嘅民生問題上「挑骨頭」，呢種繼續針對嘅作風，筆者只會講，民主黨似乎仲未適應到時代轉變，仲停留喺「反對、反對」嘅千禧年代思維。

其實睇民主黨開記者會講財政預算案，入面有一大「焦點」，就係民主黨將建議書交到財政司司長辦公室，並邀請約見陳茂波，但暫未收到回覆，即係話佢哋想約政府，但政府似乎就唔係太想理佢哋，或者安排財金官員同佢哋見面，簡單啲講，就係「唔理佢哋」。

如果特區政府最後唔安排官員見佢哋，聽佢哋講財政預算案建議，都係非常合理；想當初，民主黨核心成員包括當時嘅立法會議員參與黑暴，甚至同暴徒「同行」反政府，依家想扮無事搵政府表達建議？唔係咁善忘呀？民主黨淪落至今，包括開記者會嘅主角面口新鮮到「無乜人識」，想見政府但暫時無人理佢哋，其實講到底，都係佢哋自己攞嚟，當初揀咗反政府、撐黑暴，今日被邊緣化，係十分合理嘅結果。