黑馬涂家堯脫胎换骨　「生命鬥士」柳冕出局肥媽落淚

無綫歌唱真人騷《中年好聲音》，昨晚(15日)播出的第七集是第三部曲《團戰！影視金曲生死鬥！》，26位選手分成六組進行比賽，經過一輪激烈的團戰，由丁文俊擔任隊長的《燕尾蝶》，在有四位五燈選手加持的情況下，唱出了全晚最高分86分，周吉佩更因而激動爆喊。

另一位獲封組內MVP的選手，則為《領悟》組的涂家堯，堪稱「最強黑馬」。在之前比賽回合平平無奇的家堯，不但在是次比賽擔任隊長，更因出色唱功及意料之外的感染力，獲評審一致好評。彭健新：「最鍾意隊長把聲，佢低得嚟好實」，周國豐：「涂家堯，如果今日呢首歌你獨唱，你一定可以5燈，你唱得好好」，肥媽：「隊長今日把聲，如果你獨唱揀呢隻歌，你都贏咗九年啦！」而家堯接受評審評語前，更於台上大派勵志Bite：「雖然我哋呢隊唔係最多五燈選手，希望今日能夠證明到畀大家睇，我哋都可以做得到我哋想做嘅嘢。」獲全場熱烈掌聲。最終《領悟》組獲得了79分佳績，成為全晚第二最高分，果然勵志。

昨晚先後淘汰了6名選手，其中一位由比賽開始一直以自身堅強及正面特質，鼓勵及啟發了不少觀眾的「生命鬥士」柳冕，其出局令肥媽不捨落淚，肥媽邊喊邊說：「我一定要講點解（Foul），因為一開始柳冕就走（音），拍子唔穩定，我哋其實都好唔捨得，我哋係完全根據今日呢場嘅表現去做呢個決定。」

（點新聞特約記者陳惠芳報道）