劇場版痛失太太　Eason騷演技流出真淚

陳奕迅在歌曲劇場版《盲婚啞嫁》中飾演一位攝影師，講述他太太去世後如何走出傷痛破繭重生的故事。歌詞內容意思是指人生如戲，劇本前世今生已定，我們只能順着劇本走下去，人生就好似「盲婚啞嫁」一樣，開始時，大家都不認識大家，莫講夫妻，父母兄弟姐妹，都是出生前一早已幫你選定人選，當中是喜是悲，控制在於自己這位主角的心態。

再次與蔡思韵合作，Eason說當然開心，對方長大了不少，演戲更自然及有味道：「因為之前合作過，所以冇陌生感覺，覺得真係幾好啊……今次大家都做得好好，陳紫萱、吳肇軒、谷祖琳，甚至來影相的兩位老人家，都演得好好，就我一個演得唔夠好啦。」

Eason在MV中又喊又笑，非常投入又有戲味，何解說演得不好？他說：「我諗係剪接剪得好。導演好啊。（你係真喊喎？）係呀，真係流眼淚㗎，拍攝場地其實好多人，可能係場景搭得好，好懷舊，幫到忙。我自己則走到角落，試諗諗如果一個好開心，好樂觀的伴侶離開自己會點，諗吓諗吓，叫我喺鏡頭前，眼淚就自然咁流落嚟。不過講到演技，我真係仲有好多嘢要學，仲有好大進步空間。」

（點新聞特約記者陳惠芳報道）