攬炒環團「賺藍養黃」？特區政府必須杜絕！

稀思路/筆是機場

喺黑暴運動前後，攬炒派「掠水」、「眾籌」方式五花八門，有啲做生意搵真銀，有啲利用特區政府資源，去養住一班反政府人士，例如黑暴運動時就有好多攬炒派區議員，利用政府資源養住一班「黃助手」；又例如開食肆嘅，就咩人生意都做，錢一係落自己袋，一係養住班「黃手足」。最近，就有組織踢爆有11間環保團體參與反中亂港惡行，但部分團體一直獲得特區政府撥款。呢種「營商方式」，可以話係「賺藍養黃」，但喺新時代下，筆者覺得特區政府必須盡快斬纜，唔好再用公帑養住攬炒派分子。

根據報道，有11間環保團體有參與反中亂港惡行，其間散播仇恨香港特區政府嘅言論，甚至喺黑暴運動期間，以其垃圾回收站作據點，播放黑暴電影，鼓動市民參與黑暴；涉事嘅環保團體包括有「環保觸覺」、「綠領行動」、「守護大嶼聯盟」、「創建香港」、「香港自然生態論壇」、「龍尾環境教育中心」、「自然脈絡」、「香港海豚保育學會」、「大嶼山愛護水牛協會」、「土地正義聯盟」以及「智在環保」，其中「土地正義聯盟」，成員或者前成員就包括惡名昭彰嘅前立法會議員朱凱廸。

睇返資料，呢啲團體加埋，可能攞咗特區政府以千萬元計算嘅公帑，筆者要講清楚，呢啲錢係特區政府嘅，但講得再白啲，呢啲公帑其實都係市民嘅血汗錢；有人成立慈善機構做慈事、攞特區政府錢，無問題，但如果有攬炒組織係靠政府養住，繼而一邊「做善事」一邊反政府，特區政府絕不可能繼續畀錢佢哋，甚至應該尋求法律意見，呢啲組織過去攞咗政府嘅錢，係咪要討回部分。因為就算佢哋有做環保工作都好，特區政府不可能畀錢人「反自己」。

當有傳媒大肆報道事件時，筆者會認為呢件事係「意料之外」，但又係「情理之內」，點解咁講？大家諗下，自非法「佔中」到黑暴運動，有幾多涉事、涉案者其實一直都係用政府錢養住？講「佔中」，果時戴耀廷、陳健民，都係政府資助嘅大學副教授（或類似職級）；到咗黑暴運動，公務員、教師、社工等等，好多都係出緊政府糧，又或者所屬機構係接受政府資助。「賺藍養黃」嘅概念，不局限於有組織賺政府錢，而係就算喺個人層面，都有好多反政府嘅人一直畀特區政府養緊。呢個係咪問題？絕對係不得不正視嘅大問題。

筆者記得多年前，聽到一班建制派人士嘅對話，內容大致係建制派面對攬炒派，做網絡工作時有困難，因為對方「草木皆兵」，上至政客，下至市民，個個都願意做鍵盤戰士，情況要改變不容易；將呢個情況套用喺唔同機構、個人（攬炒分子）身上，如果特區政府唔做好審查，或者繼續資助擺明反政府嘅機構，一個又一個甚至係無數個人一邊用緊政府錢，然後或明或暗地繼續反政府，香港嘅隱患永遠都唔會消除。今次有組織、傳媒揭發有攬炒派環保團體一直攞緊特區政府錢，特區政府正好順勢，將有可能破壞到香港穩定嘅組織「清除」，以絕後患。