拍拖常話分手出辣招　張晉代執行李叫蔡少芬走

由王祖藍擔任主持的綜藝節目《有個閨密叫祖藍》，myTV Gold播放40分鐘加長版。首集嘉賓蔡少芬（Ada），自爆拍拖時曾被張晉趕走。

自言與老公「硬碰硬」的Ada，坦認拍拖時因思想較負面、每次吵架都會講分手，直到張晉有次出「殺手鐧」成功治好Ada的「分手病」：「佢話你再講多一次，我就送你走。隔咗幾日我哋又嗌交，我又話要走，佢就幫我執行李送我走。跟住我心諗尋日仲係拖住手，今日佢企喺前面拖住個喼。然後我啲眼淚就一路流，張晉呢個時候就擰過嚟問我：『以後仲敢唔敢』，好Man架佢，我就話『我唔敢喇』。」  

Ada又投訴老公是不懂表達愛的「直男」，透露曾因老公不解溫柔的說了「老夫老妻」四個字，以致二人關係鬧僵：「嗰晚我同朱茵佢哋講番以前拍拖幾開心，跟住返到房叫老公錫一啖，佢就話『都老夫老妻啦！』跟住我就靜咗，我一路落妝一路喊。咁佢知我唔開心就問咩事，嗰一刻我就話我好傷心，我哋只係得嗰四、五年，如果已經係老夫老妻，咁我哋以後係乜嘢？話我接受唔到，跟住佢就攬住我講Sorry。第二朝佢就無啦啦又拖我隻手、又錫我，我忍唔住問我老公：『點解我咁快樂嘅？』佢就話：『係呀老婆！我都覺得係呀！』」 相當甜蜜。

（點新聞特約記者陳惠芳報道）