張敬軒尾場「唔要命咁唱」　場場超時罰款百萬跪玻璃謝罪

張敬軒的紅館個唱於昨晚（29日）舉行最後一場補場，軒仔全晚情緒特別高漲，更言「唔要命咁唱」。

軒仔在開場時已說，入場觀眾要有心理準備會全晚叫破喉嚨，並多謝這26場入場的觀眾。他笑稱今次演唱會由40歲搞到41歲︰「我自出娘胎以來，到今時今日都唔敢諗自己會開超過25場演唱會，而今晚最值得紀念嘅，就係今晚係我人生第50場紅館演唱會。」他坦言，在疫情下仍有這麼多人支持自己，非常感恩。軒仔又言視每晚演出都是最後一場，唯獨今晚更是「唔要命咁唱」：「人生唔要命、豁出去嘅時間唔係咁多。」

軒仔這晚請來生死之交王菀之擔任嘉賓。被稱為「皇后」的王菀之，與「皇上」張敬軒向來老友鬼鬼，張敬軒又以「每次演唱會都不可缺少呢個人」來介紹王菀之：「我哋除咗係靈魂交雜嘅朋友，仲要試過出生入死，試過有次演出，因為主辦方溝通出現問題，我哋被困，以為唔走嘚，好彩朋友嚟救我哋，我哋先可以咁完整咁喺舞台，我咁大個仔未見過長嘅牛肉刀！」

王菀之又為張敬軒讀出一封信作為演唱會禮物，其中說到：「幾年前你喺同一地方問過我『如果下一世遇唔返我點算呢？』」軒仔聽到此句已按耐不住情緒爆喊，王菀之繼續哽咽說：「我怕你唔記得，依家再答你一次，我會去搵返你！」然後二人相擁，場面非常溫馨感人。除王菀之外，昨晚嘉賓還有MIRROR成員Ian（陳卓賢）和阿Jer（柳應廷）。

此外，軒仔個唱晚晚超時預計要罰款過百萬，軒仔笑言打算向老闆跪玻璃。

（點新聞特約記者陳惠芳報道）