張敬軒演唱會邀Collar做嘉賓 偕Stephy唱《十分愛》
THE NEXT 20張敬軒演唱會每晚請來不同嘉賓，張敬軒（軒公）昨晚（26日）請來鄧麗欣（Stephy）及女團Collar任嘉賓，他先是與Stephy懷緬過去兩人合作《十分愛》的日子，繼而再坐上樂壇關愛座，更笑指Collar送的禮物似去老人院探病。
軒公昨晚台上謂，人生中有一項工作他甚少涉獵，就是拍電影。他曾拍過一部電影，但從不夠膽翻看，因為當年的樣子又乾又瘦又無運行。但該片讓他識了一位好朋友，繼而介紹Stephy出場，兩人甜蜜蜜手拖手合唱《十分愛》。其後Stephy說「你冇個時《十分愛》咁乾乾瘦瘦……」軒公說：「其中有一幕講我想溝你，你坐係個鋼琴隔離，呆左咁望住我，但我睇唔到你有愛的眼神。」「係呀，我記得拍個晚係凌晨四點幾，我瞓着左，導演叫我埋位啦，我就懞懞惺惺出來拍呢場戲。其實我覺得個劇情都唔係咁好啦，你一個咁有才華靚仔，我係戲裏面點解唔揀你，揀左阿力哩？劇情唔係好得。」軒公忍唔住爆金句，「戲外十幾年後，你揀番我咪得囉！」觀眾即時歡呼拍掌。
到安歌環節，軒公請來第二位嘉賓，他說，「近年樂壇風氣唔同左，歌手不是再一定由唱片公司推介，係由觀眾選出心中super star ，我好鍾意睇比賽節目，過程當中睇住這些小朋友過五關斬六將踏上更高舞台。」然後他請Collar出場。
Collar又拿出一籃醬汁，「我地祝你愈食愈好，作品愈來愈高汁，有啖好食啦你。」 軒公收禮後笑言，「你地真係有老人家心。各位睇下，依家啲後生，送禮好似去老人院探病咁，我呢位院友多謝咁多位義工……哈哈…叔叔降番落去先，轉頭帶你地去睇金魚……」
此外，軒公於天梯上唱到《On my way》時，現場音響有少少失靈，軒公臨危不亂照把整首歌唱完。完騷後仍似放唔低這次小瑕疵，於IG有感而發：「今晚係23場以來最多設備、技術及人為固障（故障）的一晚，我代表我個人以及製作團隊向今晚入場支持的觀眾致歉！作為一個專業表演者及製作團隊，我哋有義務要每晚都為觀眾帶來相當水準、負責任嘅演出。」並寄語製作團隊保持謙卑、好學、能接受意見並且時刻自我反省。切勿自信和驕傲。
（點新聞特約記者陳惠芳報道）
更多閱讀：
