來論｜英議員欲擴大BNO計劃　想收留更多香港「刁民」？

筆是機場/稀思路

香港人移居英國，最出名係咩？就係出醜！最近有人網上爆料，指一班BNOers（BNO移民人士）違法放煙花被英國警方警告，但就拒絕合作，仲「發老爛」加用「港式英語」同警察理論，結果被鎖上手扣帶上警車，被控擾亂公共秩序同社會治安。爆料人士仲話，原本警察只係想口頭警告佢哋，但呢班BNOers拒絕合作，結果當然係自討苦吃。見到呢啲醜態，然後睇新聞又見到「22位英國下議員提案 擴展BNO至1997年後出生港人」，筆者就喺度諗，英國係咪想收多啲「問題港人」，搞亂英國呢？

對於以上兩宗事件，筆者首先想講，好心啲「移英」香港人就「醜」少一陣啦，要同人理論，可以，但如果連英文都未講好，人哋連你哋講咩都未知，咁就唔係理論，係發出噪音啦；例如」we are pay buy in shop,why we cannot play,cannot play not sell in shop」，又「are」又「pay」又「buy」咁樣連住、出現，雖然外國人都未必好注重文法，但叫人點明白、回應你哋呢？又例如「you say thing I don’t know」，更完全將「港式英語」發揮到「極致」，如果筆者係當時執法嘅警察，絕對可能會覺得「俾人玩緊」！

以上事件顯示出嘅深層次問題，就在於有部分香港人以為自己「大晒」，甚至去到邊都以為自己「大晒」，之前喺香港，就係因為有不法之徒以為自己不滿特區政府就可以「為所欲為」，所以先會發生黑暴運動；依家去到人哋國家，呢班人如果仲係覺得自己「大晒」，咁就真係太天真喇！而站於警察立場，佢哋有酌情權（discretion）決定網開一面，但如果有香港移民犯法仲要玩嘢，人哋仲要俾面你哋咩？唔好玩啦！

所以，當筆者睇到有傳媒指英國有下議員建議將BNO計劃擴到「建議父母任何一方持有BNO護照人士，即可以獨立申請人身份申請移民英國」，第一個反應，就係有英國政客為咗做好場政治騷，連實際情況都不顧。從利益角度睇，英政府之前嘅BNO「5+1」計劃，多多少少都係想吸納一班有錢港人「連人帶錢」到英國，變相促進埋英國經濟；從政治角度睇，黑暴運動已經消亡，英國無需要再扮「支援港人」；從英國社會角度而言，放多啲香港「年輕人」到英國，係想佢哋搶當地年輕人飯碗，定係等佢哋喺英國搞「街頭運動」？

凡事要量力以為，英國可能想借香港事件搶道德高地，「提高」自己嘅國際形象，但今日英國，已經唔係以前嘅「大不列顛」，自己搞唔好疫情、經濟，然後又吸納更多香港人到英國「搶飯食」，英國社會裡面消唔消化到？又或者，如果有香港人去到英國搞黑暴，英政府又點處理（之前已經試過有港人示威，繼而縱火、破壞）？一個正常嘅國家，都會想辦法吸納優質移民，英國依家反其道而行，表面上喺國際社會上好似「好型」咁，但往後嘅日子，英國政府肯定要「找數」！