（有片）6月九展開騷　Supper Moment拍片還擊網民負評

Supper Moment今日（28日）公布6月26、27日於九龍灣國際展貿中心Star Hall舉行十五周年紀念活動《Supper Moment一直相信演唱會》，門票於下周一（31日）發售。門票內部認購秒速爆滿，令四子非常開心。

早前Supper為撐90歲修哥(胡楓)在紅館開騷，答應成為演出嘉賓，更陪修哥在無綫節目宣傳，合唱《舊歡如夢》，而被嘲「濕九Moment」。網民又指責他們為賺錢成為「搖滾叛徒」，「剩係識得搵人仔」。一直沉默不作應對，用時間證明一切的Supper決定藉着開騷拍片交待心聲，一次過滿足歌迷、記者和網民，也一次過向愛護他們的歌迷交待。

影片開始，看到四子圍桌而坐，劈頭一句就以叮噹卡通式嘻笑怒罵，「真係好嬲，可惡呀...點解要話修哥！要話我哋呀！」Sunny、阿雞以黑色幽默發言:「食飯啦，有飯好食啦！啲飯重暖，定人情冷暖呀？」阿達更搞笑拿起飯碗問隊友:「呢啲唔係電視飯呀？(唔係道具？)」引來隊友笑到差點噴飯。

四子直言很嬲外面有人不停鬧他們時，連離世經理人也不放過。他們說:「鬧我們冇所謂，講Gary及家人真心不能容忍，做人要有同理心，唔好鬧Gary，我地對唔對得住Gary，有好多嘢我地自己知，無需要話比人知。」

外間指責他們是「搖滾叛徒」，CK在片中反問:「搖滾精神是什麼？是反叛？是一定要反一些制度？其實鬧我哋『搖滾叛徒』係另一種稱讚，係好事！」

說到有口痕網友鬧他們默不作聲是「潛水」，阿雞笑怨阿達:「叫咗你唔好成日玩潛水㗎啦！」阿達苦笑回話:「我係玩水上活動，但係我冇潛水，我一直浮係水面架！」

CK話，「有些人覺得你總之冇唱佢心目中想聽D嘢，佢就可以隨意粗口罵你！」而阿達就插嘴調解隊友心情:「其實有聽同冇聽係睇得出，邊啲係樂評，邊啲係社評，我覺得大家應該分開。」言下之意，把社評連結音樂，這樣對任何音樂人也不公平。四子在影片中自言很蠢，不懂玩弄社交媒體來經營「形像」，真心只係識得玩音樂，不識玩Social Media，可能真要學下。

有人留言鬧他們「搵人仔」，阿雞搶答:「其實呢啲係舊聞啦，我哋『世界變了樣演唱會』已經開始世界巡演，內地都有演出，唔係今時今日事，當年大家又冇唔高興？」講到錢，Sunny收起笑臉認真提醒大家:「大家可能忘記了做音樂真係要錢，做每張專輯，演唱會制作，都好需要錢upgrade，又令我諗起，以前的人價值觀不知何解，覺得一隊樂隊有商業價值，又會標籤了他們是『搖滾叛徒』。但冇錢點錄音？人往往就係困係自己價值觀中，但有冇諗過，標簽未必係真！近兩年我體會更深玩音樂條路唔易行，正如我們《無盡》中歌詞一樣，去到某階段就有不同標簽，標簽我的形狀我的模樣，『誰又能能鑑定你的醜惡與美好？』我覺得歌詞一早寫晒出來，非常之中。」

（點新聞記者陳惠芳報道）