鄺士山夥龍門賣「有窿」口罩捱轟 網民：不如帶生果網

近排被「黃絲」鬧「食人血饅頭」嘅嗰班人，據稱同龍門冰室老闆張俊傑有千絲萬縷嘅關係，就連近日因強推龍門「有窿」「良心口罩」而被圍插嘅「黃化學專家」鄺士山亦被揭發屬於呢個「血饅聯盟」。講得出「CuMask含銅吸入或有損健康」荒謬言論嘅鄺士山日前狂sell「龍門冰室×LOFT，2合1複合熔噴布」口罩，仲話「有少少窿但冇穿，完全可以！」雖然龍門口罩打「良心」牌，仲要用埋「黃色」盒，但鄺士山知道龍門唔得「黃絲」心，專登強調「你哋鍾唔鍾意龍門冰室同佢哋嘅口罩質素喺冇關係嘅」。不過，佢呢啲辯解被「黃絲」寸到飛起，「Jojo Liu」就貼出生果網套嘅相，揶揄「咁我不如帶呢個啦！夠晒窿。」有網民感嘆「人血張」簡直係「人渣磁石」，直言驚用咗佢哋「良心」嘢就冇晒良心，所以還是罷了。

鄺士山亦不甘示弱，留言強撐「有窿冇穿2層真係用得」，噚日更開post鬧返轉頭：「黄色就啱晒？」，轉發數月前得出「如果有窿，複合式比單一片熔噴布安全」嘅貼文，仲當自己真理化身斥責唔接受佢意見嘅「黃絲」：「二合一熔噴布有窿都唔穿嘅原因一早講咗，又唔Google我舊貼文就盲鬧我同龍門口罩！」