訟黨區議員「炒車」 趕持牌小販擺檔

公民黨沙田區議員陸梓峂昨日（27日）在 facebook炫耀「政績」，表示留意到有「不明來歷」嘅小販喺區內擺檔賣水果，於是向食環署舉報，點知對方原來有合法擺檔嘅流動小販牌，結果陸梓峂仲要跌落地揦番揸沙話，雖然可以合法擺檔，但就唔應該喺馬路中央開檔，又話近日天氣酷熱，水果長時間喺高溫下好易變壞，奉勸大家幫襯前要「記得留意」。

該帖文惹來大批網民批評，陸梓峂卻聲稱自己賬號「被人入侵」，搞到有啲帖文同相「冇咗」，好彩我哋一開始就有cap圖，可以保留網民寶貴嘅意見。「熱血公民」副主席鄭錦滿亦嚟湊熱鬧，cap埋陸梓峂原post揶揄：這是香港人直選的「泛民」議員嗎？佢批評呢位歷屆最後生嘅女區議員連持牌小販都想趕絕，仲趁機貼埋「熱血公民」政綱：復興「本土經濟」同扶持墟市小販，乘機抽水宣傳。

事實上，公民黨近年多次聲稱政府對小販「趕盡殺絕」，又要求政府簽發更多流動小販牌照，令市民有更多選擇，前黨魁余若薇任內多次幫無牌小販爭取牌照，睇怕佢都估唔到啲後輩咁「青出於藍」。其實近日疫情反覆令唔少抗爭派區議員冇晒「人血饅頭」，迫住舉報「同路人」非法賽車和拾荒阿婆阻街，以刷存在感。